فى لقاء نوعي بالصحفيين …عقار : احلم بدولة القانون وليس دولة الرجالوالإعلام الكاذب سلاح دمار شامل

فى لقاء نوعي بالصحفيين …
عقار : احلم بدولة القانون وليس دولة الرجال
والإعلام الكاذب سلاح دمار شامل

بورتسودان:انصاف العوض

أعرب  نائب رئيس مجلس السيادة الفريق أول مالك عقار عن حلمه بأن يكون السودان دولة قانون  وليس دولة رجال وقال عقار ان   من فوائد الحرب انها وحدت السودانيين خلف القيادة  ودعا القوى السياسية لنبذ الخلافات والوقوف وقفة رجل واحد خلف القيادة وقال إن هذه الوقفة هي السبيل للانتصار على عدوهم الموحد وقال عقار في لقاء  إجتماعي مع الإعلاميين بفندق القرآند بحضور وكيل وزارة الثقافة والسياحة دكتور جراهام عبدالقادر ومفوض السلام الأستاذ  سليمان الدبيلو قال :
(طبيعي جدا في الحرب نخسر مناطق ومدن ولكننا  لم  نخسر  الحرب  ولن  نفقدها   طالما المواطن السوداني  يقف خلف قيادته.)

. وأشار عقار الي خطل  بعض من يروحون الي ان  العساكر (عاوزين السلطة.. وقال( انا  ما شايف اي زول قاعد في السلطة عاوز يستمر كلهم  عاوزين  يتخارجوا) بالنسبة للقوى السياسية يمشو   الانتخابات تجيب منو ما مهم.

وقال عقار ان الحرب عندها افرازات كتيرة. وزاد ( هناك  مستنفرين وبراؤون و مشتركة كلهم شايلين سلاح.. الاسماء  دي كلها ممكن يكون فيها حميدتي لكن لاننا ضقنا عضة الدبيب  نعرف كيف نقدر نواجهه).
وبين عقار ان دور  الإعلاميين عمل  مصالحات وقال إن الكذب في الصحافة هو سلاح الدمار الشامل الإنسانية. داعيا الإعلاميين لتوجيه  القيادات كيف تدير المعركة وما (تتجادعو عشان ما يفلق زول تاني.
شفت صحفيين بتجادعو.. وفي بذاءة في الكتابة زي الريح البنقض الطهارة.. عاوزين تماسك الصحافة والصحفيين وبعد النصر العمل على  إنشاء الدولة السودانية ثم تسلم للشعب السوداني، لابد نتحدث عن سودان بعد الحرب ولا نفكر في إعادتها سيرتها الأولى لان تلك السيرة لم تكن جيدة، نحن نخلق الدولة  بأجمل  مما كان، الوضع القادم لا يتحمل الحرب لابد نجاوب كيف يحكم السودان ونقلل الصراع بين القوى السياسية. ولاءنا لابد أن يكون  للسودان.
وأكد عقار ان الدول لا تقف  معاك الا لمصالحها  واأهلنا بقولو بيت الشورة ما خرب ولو رجعنا لنفس الشجرة الزمان معناها نحن رحنا. هنالك مبادرات كثيرة نحن سندرسها
في ناس بقولو لو شفتو صقرحايم من  الصباح حاتموت بهيمة أو ماتت في ناس شايفين السودان حايموت.. كدابين  السودان  حي ما حايموت)

وقال عقار انه  اكتر قيادي بتابع الإعلام وخاصة التلفزيون لان الإعلام هو سلاح الحكومة، الإعلامي من حقو ينتقد انا من حقي  اوديهو المحكمة أو اتركو لذلك تصنيف الإعلامي خطأ واذا المسؤول عمل خطأ والاعلامي سكت ده غلط.)
واقر عقار ان القيادات السودانية من زمان تبدل  الوجاهة بالمواجهة وانتو عارفين  انا قاصد شنو) في إشارة منه  للاحتفاء  بالإعلام الخارجي  قال إن الصحفيين  الموجودين في السودان هم النايمين  معاك في خندق واحد ومن حقهم يجدوا  التكريم.
ووجه عقار صوت لوم للصحفيين على لومهم للحكومة ودعاهم  لوضع برنامج واضح أمام الحكومة  وماذا يريدون منها  لاخراجها واجبارها على تنفيذه  ووعد عقار بالوقوف مع الصحفيين في اي مشروع يخدم قضيتهم.
  وأضاف انه لا يوجد سياسيين بعترفون بالخطأ. وقال إن هنالك 73حربا قامت في السودان كلها صناعة الحكومة. ده  جنا الحكومة ولدتو  ومشت خلتو  والاتفاقيات  هي معالجة للعنف وليس معالجة للقضية الأساسية
ونفي وجود  حرب بين الحكومة والإعلاميين وقال ( دي بلبصة ساي. انتو مهمين للدولة هي محتاجة لكم أكثر مما انتم بحاجة لها).