الفاتح محمد.الحسن يكتب : إخلاص..الوجع المقيم
(الاخلاص كنا نحسب بخطواتك الحياة ..والعام يحسب بفقدك الأيام )
الخريف يدخل بخطي.متثاقلة والطرقات تضج بالحنين ..ولم تبارح نجوم الشجن سماوات الوجدان تومض في أسي يشبه ليالي الخريف التي تدس إكتئابها في نقيق الضفادع وباقي عراك بين كلاب الليل ..والزقاق يتوهط قلب الحنين (حمد الريح)يترجي اوتار العود بعض الرحيل والشلكاوي الجميل (عبد المنعم عبد الحي )يلون الوجدان
نار البعد والغربة
شوقي لاهلي والصحبة
شوق لكل جميل في الحي
شوق للشينة لو….لو كنتي جيتي قبيل هسه كان مرقتي مع ناس اخلاص ..امي تستشهد دوما بأخلاص..واي إخلاص كانت ونحن أيضا ايقاعنا اخلاص ..كنا نحس بالبيت عند رجوعنا بصوت اخلاص…. بحركة اخلاص ..من كان يحسب يوما أن البيت بدون الاخلاص …
شوق للشينة لو صعبة
بين اليقظة والأحلام
بين اجفان تقول للنام
اريت..النوم يزو..يا حومة (الفاتح بيكوي كيف ..هههه كذلك كانت فرحة تسع الكبير والصغير والزقاق ..الاخلاص..نحن لا نبحث تاريخ لاحزاننا..لا زلنا نحس خطاك في كل جزء في البيت ..والزقاق بتمازجه النبيل يصرخ مع حمد الريح
اريت النوم يزورني اليوم
انوم لو ليلة في كل عام
بين الضحكة والضحكة تطل الاخلاص بهدوءها المهيب ..والزقاق يترجي (المغني مسافة يلتقط بعضه
اهه بتطلع في دمع العين
وزفرة بتشعل انفاسي
اه بتدواي فينا حنين
والحنين يتجول والإخلاص من بيت ناس الشيخ ود الفقير كانت لها عندهم مقام ومعزة وظلت صداقتها وهاجر ممتدة بالمعاني لم يفرقهما حتي الرحيل ..وبينها والام العظيمة (فوزية)سر لم تفصح الأيام عن جماله ونبله بعد اي وثاق كان بينهما؟؟
حمد الريح يتجول الزقاق بقسوة الحنين
لو عبرة تزيل غصة
لو ذكري تهدي حنان
لو انسان صبح قصة
الله لو انسان صبح قصة ونحن نتاوق بين الحين والآخر جوانا
احساس يكاد يصل حد اليقين (استغفر الله العظيم) أنها طالعة من ناس الشيخ..ترتب في البيت تمد ايديها دوما محملة ..تسأل عن حالك ..شربت الجبنة. اتغديت وووووو الم اقل لكم أن الاخلاص هي تفاصيل البيت الحميمة وروح الزقاق
انا القصة يا امدرمان…
(رحم الله اخلاص في ذكري رحيلها وغفر ذنبها واسكنها برحمته الفردوس الاعلى مع النبيين والصديقين والصالحين والشهداء وحسن اولئك رفيقا
كسرة …
اريت النوم يزورني اليوم